ბაქო-თბილისი-ყარსის შემაერთებელი სადგური ახალქალაქში აშენდება
საქართველოს პრემიერ-მინისტრ მამუკა ბახტაძის შეფასებით, ბაქო-თბილისი-ყარსის პროექტი ჩვენი ქვეყნისთვის, სტრატეგიული მნიშვნელობისაა. მისივე თქმით, საინჟინრო გადაწყვეტილების საფუძველზე, შემაერთებელი სადგური საქართველოში, ახალქალაქში აშენდება.
„ეს არის სტრატეგიული მნიშვნელობის პროექტი ჩვენთვის. არსებობს სამ ქვეყანას შორის ხელმოწერილი ხელშეკრულება, სადაც კონკრეტულად განსაზღვრულია პრინციპები, რომლითაც ხორციელდება ეს პროექტი. სამუშაოების დიდი ნაწილი დასრულებულია და ჩვენ აუცილებლად დავამთავრებთ პროექტს იმ საინჟინრო გადაწყვეტილებით, რომელიც არსებობს.
ამ საინჟინრო გადაწყვეტილების მიხედვით, შემაერთებელი სადგური არის სწორედ საქართველოს ტერიტორიაზე, ახალქალაქში. ანკარაში რა შეხვედრაც გაიმართა, ეს არის სრულიად სხვა რაკურსის შეხვედრა. როგორც ჩანს, სამ ქვეყანას შორის გაფორმებული ხელშეკრულების თანახმად, მხოლოდ ყველა ქვეყნის თანხმობის შემთხვევაშია შესაძლებელი, მას შემოუერთდეს ნებისმიერი სხვა მოთამაშე. სწორედ საქართველოს ტერიტორიაზე იქნება შემაერთებელი სადგური, სადაც მოხდება ე.წ. ევროპული სტანდარტის რკინიგზის შეერთება ჩვენი სტანდარტის რკინიგზასთან და ეს მოხდება სწორედ ახალქალაქში. არანაირი სხვა“, – განაცხადა ბახტაძემ.
შეგახსენებთ, რომ ანკარაში რუსეთის, თურქეთისა და აზერბაიჯანის სარკინიგზო კომპანიების ხელმძღვანელებმა სამმხრივი მემორანდუმი გააფორმეს, რომლის მიზანი ბაქო-თბილისი-ყარსის მარშრუტზე რეგულარული სარკინიგზო მიმოსვლის უზრუნველყოფაა. რუსეთის რკინიგზამ, ხელმოწერილ მემორანდუმთან დაკავშირებით, ოფიციალური პრესრელიზი გაავრცელა, სახელწოდებით: „რუსული სარკინიგზო ლიანდაგი შესაძლოა, თურქეთამდე გაგრძელდეს“.