„გავერთიანდეთ და ხმა ამოვიღოთ აზარტული თამაშების უბედურების წინააღმდეგ. შევწყვიტოთ ჩვენი შვილების სიცოცხლის შეწირვა ამ ამ ჭირს“

ანა დოლიძე სოციალურ ქსელში წერს:

„ჩემო კარგო ხალხო, არ არის კარგი ამბავი. სანდრო ბერაძე იპოვეს გარდაცვლილი. ნათელში იყოს მისი სული. ვიზიარებ მისი ოჯახის ღრმა მწუხარებას. ეს დიდი ტრაგედიაა. ჩვენის მხრივ კი გავერთიანდეთ და ხმა ამოვიღოთ აზარტული თამაშების უბედურების წინააღმდეგ. შევწყვიტოთ ჩვენი შვილების სიცოცხლის შეწირვა ამ ჭირს. ქართული ოცნება / Georgian Dream სასწრაფოდ დადეთ კანონმდებლობა“.

 საქართველოს პირველი არხის ოპერატორის სანდრო ბერაძის ცხედარს ცხვარიჭამიაში მიაგნეს.

სანდრო ბერაძეს ოჯახი 25 ოქტომბრის შემდეგ ეძებდა.  სამძებრო სამუშაოებში პოლიცია, სამაშველო სამსახური და ოჯახი მონაწილეობდა.

ახალგაზრდა მამაკაცის ცხედარს გამომძიებლებმა ტყეში, რეინჯერების მიერ დაყენებული ე.წ. ფოტოხაფანგით მიაგნეს.

ფოტოკამერამ სანდრო ბერაძე თბილისის ეროვნული პარკის ტერიტორიაზე 25 ოქტომბერს 18 საათსა და 46 წუთზე დააფიქსირა.

დაკარგული ბიჭის მობილურის სიხშირე ანძების მიხედვით ბოლოს ცხვარიჭამიის ტყეში დაფიქსირდა.

ოჯახის წევრები ახალგაზრდა მამაკაცის თვითმკვლელობის მიზეზად ფინანსურ პრობლემებს ასახელებენ. სანდრო აზარტულ თამაშებზე იყო დამოკიდებული, რის გამოც ბოლო სატელეფონო საუბრისას, დედას ბოდიში მოუხადა.

შინაგან საქმეთა სამინისტრო გამოძიებას თვითმკვლელობამდე მიყვანის მუხლით აწარმოებს.