„გარკვეულ ეტაპზე ყველა ქვეყანას მოუწია ამ სავალდებულობის პირდაპირი თუ ირიბი მექანიზმების შემოტანა“-ამირან გამყრელიძე

დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა:

-„არასწორი ინტერპრეტაციებია, რომ ეს ჩვეულებრივი გრიპია, მარტივად გადავიტანთ, მერე რა მოხდა და ა.შ. ასევე გალღვა ყინული სოფლის ექიმებში, მიუხედავად იმისა, რომ მრავალჯერ გაიარეს გადამზადება. მაინც ეშინოდათ ვაქცინის, ეს თანდათან ამ მობილური ბრიგადების ჩარევის ფონზე უმჯობესდება. ბევრი არა, 1200 ადამიანი დამატებით აიცრა მარათონის ფარგლებში. მომავალ კვირაში სამცხე-ჯავახეთი და დასავლეთ საქართველო აქტიურდება უფრო მეტად. ვფიქრობ, ამ მარათონით, სოფლის მოსახლეობაში უფრო მეტი აქტივობა გვექნება, მაგრამ ეს, რა თქმა უნდა, ვერ გადაწყვეტს აცრების პრობლემას. მომხრე ვიქნებოდი, აცრების გასააქტიურებლად სხვადასხვა შემზღუდველი თუ წამახალისებელი ღონისძიებების. სოფლებში რომ დავდივართ, გვეუბნებიან, თუ იქნება სავალდებულო, ავიცრები, თუ არადა, – არა. იმავეს გვეუბნებიან სხვადასხვა პროფესიის ადამიანები,  ვფიქრობ, ნოემბერში ეს საკითხი უნდა გადაწყდეს. ერთი მხრივ, გარკვეულ ჯგუფებში სავალდებულო ვაქცინაცია, მეორე მხრივ კი არაპირდაპირი, ე.წ. ირიბი მანდატორიზმი, როდესაც აუცრელ ადამიანებს ექნებათ ბარიერი სხვადასხვა ტიპის ღონისძიებაში მონაწილეობისას. ვფიქრობ, ეს ერთადერთი ბერკეტია. მას ბევრი ქვეყანა იყენებს აცრების გასააქტიურებლად. ეს მექანიზმი გარკვეული ეტაპის შემდეგ შემოაქვს. მოსახლეობის 35-37%-ზე შეიძლება ავიდეთ ნებაყოფლობითი ვაქცინაციით, მაგრამ შემდგომი გაზრდა უკვე რთული იქნება,  სხვა ტიპის მექანიზმები თუ არ ჩაერთვება. რატომ არ გადავდგით ეს ნაბიჯი აქამდე? ყველაფერს თავის დრო და ფაზები აქვს განვითარების. სავალდებულო აცრა რთულად გადასაწყვეტი საკითხია, ძირითადად, აცრების დიდ კამპანიებში ეყრდნობა პირველ ეტაპზე აქტიურ კომუნიკაციას და ნებაყოფლობითობას, მაგრამ გარკვეულ ეტაპზე ყველა ქვეყანას მოუწია ამ სავალდებულობის პირდაპირი თუ ირიბი მექანიზმების შემოტანა. ზოგისთვის ეს იყო მაშინ, როცა მიაღწიეს მოსახლეობის 40%-ის ვაქცინაციას, დასავლეთის ქვეყნებში – როცა მიაღწიეს 50-55 %, ჩვენთან კი, როგორც ჩანს, ეს ზღვარი არის 35-37%-ის ფარგლებში. ნებაყოფლობითობით მოსახლეობის ამაზე დიდი ნაწილის აცრა გაგვიჭირდება“.

კომენტარები