ერთიანი ეროვნული გამოცდები – როდის დაიწყება შედეგების გამოქვეყნება?

შეფასებისა და გამოცდების ეროვნული ცენტრი ინფორმაციას ავრცელებს:

„ერთიანი ეროვნული გამოცდები 25 ივლისს სამოქალაქო განათლების გამოცდით დასრულდა. ჩატარდა ასევე სტუდენტთა საგრანტო კონკურსი. გამოცდებმა მშვიდ ვითარებაში, ექსცესების გარეშე ჩაიარა.

მიმდინარეობს ნაშრომების გასწორების პროცესი. შედეგების გამოქვეყნება  ეტაპობრივად, სავარაუდოდ, აგვისტოს პირველი ნახევრიდან დაიწყება. გამოსაცდელები საკუთარი შედეგებისა და ნაშრომების ნახვას შეძლებენ გამოქვეყნებისთანავე შეფასებისა და გამოცდების ეროვნული ცენტრის ოფიციალურ გვერდებზე: www.naec.ge და online.naec.ge.

ერთიან ეროვნულ გამოცდებზე 94%-მდე აბიტურიენტი გამოცხადდა, სტუდენტთა საგრანტო კონკურსზე კი – გამოსაცდელთა 78%-ზე მეტი. იყო დაგვიანების ერთეული შემთხვევები და გამოცდიდან მოხსნის სამი ფაქტი (გამოცდაზე მობილური ტელეფონისა და დამხმარე მასალის შეტანის გამო).

2020 წლის საგამოცდო პროცესი ერთიანი ეროვნული გამოცდებით 6 ივლისს დაიწყო. საგამოცდო ცენტრები გაიხსნა ბათუმში, ფოთში, ზუგდიდში, ოზურგეთში, ქუთაისში, ახალციხეში, გორში, თბილისში, რუსთავში, თელავსა და ხულოში.

როგორც ცენტრში აცხადებენ, შეფასებისა და გამოცდების ეროვნული ცენტრი ზედმიწევნით იცავდა გამოცდებზე უსაფრთხოების წესებს, რომლებიც შეიმუშავა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრომ. გათვალისწინებული იყო როგორც მაგიდებზე არსებულ დამცავ ფარებთან, თერმოსკრინინგთან, შესაბამისი დისტანციის დაცვასთან, ასევე კორონავირუსის გავრცელების პრევენციასთან დაკავშირებული ყველა რეკომენდაცია.

გამოცდებისათვის რეგისტრირებულთა რაოდენობაა:

  • აბიტურიენტები – 39 300-ზე მეტი;
  • სტუდენტები – 3 600-ზე მეტი;
  • მაგისტრობის კანდიდატები – 12 600-ზე მეტი;
  • მასწავლებლობის მსურველები – 12 000 – მდე.

მასწავლებლობის მსურველები გამოცდებში  22  ივლისიდან ჩაერთვნენ. სტუდენტთა საგრანტო კონკურსი 25 ივლისს გაიმართა. მაგისტრობის მსურველთათვის გამოცდები კი  1-4  აგვისტოს ჩატარდება.

„შეფასებისა და გამოცდების ეროვნული ცენტრი კიდევ ერთხელ შეახსენებს აბიტურიენტებს, რომ  სარეგისტრაციო განაცხადში საგანმანათლებლო პროგრამების მითითებისა და შეცვლის საშუალება მათ აპელაციების შედეგების გამოქვეყნებიდან მომდევნო დღის ჩათვლით ეძლევათ. მნიშვნელოვანია ისიც, რომ ორი ან მეტი არჩევითი საგნის მონიშვნისა და ერთ-ერთ მათგანში ჩაჭრის, ან რომელიმე მათგანზე არგამოცხადების შემთხვევაშიც, აბიტურიენტი ინარჩუნებს ჩარიცხვისა და სახელმწიფო სასწავლო გრანტის მიღების შესაძლებლობას.

შეფასებისა და გამოცდების ეროვნული ცენტრი კიდევ ერთხელ სთხოვს აბიტურიენტებს, საკუთარ რეიტინგულ სიაში ნებისმიერი ცვლილების შეტანის შემდეგ არ დაავიწყდეთ  გამოიყენონ შენახვის ღილაკი და დაიმახსოვრონ ყველა ცვლილება. ასევე, შედეგების გამოცხადების შესახებ ან გამოცდებთან დაკავშირებულ ნებისმიერ ინფორმაციას გაეცნონ ცენტრის ოფიციალურ ვებგვერდსა და ფეისბუკგვერდზე“.

25 ივლისს, 2020 წლის ერთიანი ეროვნული გამოცდები სამოქალაქო განათლებისა და სტუდენტთა საგრანტო კონკურსის გამოცდებით დასრულდა. შეფასებისა და გამოცდების ეროვნული ცენტრის დირექტორი სოფო გორგოძე აბიტურიენტებისთვის ბოლო გამოცდის მიმდინარეობას  ქუთაისში გახსნილ საგამოცდო ცენტრებში დააკვირდა.

სოფო გორგოძე ქუთაისის №1, №23 და №42, საჯარო სკოლაში განთავსებულ საგამოცდო ცენტრებში იმყოფებოდა.

2020 წლის ერთიანი ეროვნული გამოცდები შეაჯამა:

-„წლევანდელ გამოცდებზე ორი მთავარი მიზანი იყო შესასრულებელი. ერთი, – პანდემიის პირობებში აბიტურიენტებისთვის შეგვექმნა ისეთი გარემო, რომ მათ მისცემოდათ შესაძლებლობა მაქსიმალურად გამოევლინათ საკუთარი ცოდნა და უნარები. მეორე, – ასეთი მასშტაბური ღონისძიების მიმდინარეობისას თავიდან აგვეცილებინ​​ა ვირუსის გავრცელების საფრთხე. ვფიქრობ, სხვადასხვა უწყების მუშაობის შედეგად ორივე მიზანი მიღწეულია. იყო კორონავირუსის შემთხვევა მაგრამ აბიტურიენტი არ გამოეთიშა პროცესს და მიეცა გამოცდის ჩაბარების შემთხვევაში.

2020 წლის ერთიან ეროვნულ გამოცდებში რეგისტრირებულთა (39 300-ზე მეტი აპლიკანტიდან) 94%-მა მიიღო მონაწილეობა, გამოცდიდან მოიხსნა 3 აბიტურიენტი, მათგან ერთი მობილური ტელეფონის გამოყენების ორი  დამხმარე მასალის აღმოჩენის გამო“.

აბიტურიენტებს სარეგისტრაციო განაცხადში საგანმანათლებლო პროგრამების მითითებისა და შეცვლის საშუალება მათ აპელაციების შედეგების გამოქვეყნებიდან მომდევნო დღის ჩათვლით ეძლევათ. მნიშვნელოვანია ისიც,  ორი ან მეტი არჩევითი საგნის მონიშვნისა და ერთ-ერთ მათგანში ჩაჭრის, ან რომელიმე მათგანზე არგამოცხადების შემთხვევაშიც, აბიტურიენტი ინარჩუნებს ჩარიცხვისა და სახელმწიფო სასწავლო გრანტის მიღების შესაძლებლობას.

2020 წლის გამოცდები მასწავლებლობის მსურველებისთვის 30 ივლისის ჩათვლით გრძელდება, აგვისტოს დასაწყისში კი გამოცდებს მაგისტორობის მსურველები ჩააბარებენ.

კომენტარები