მეუფე შიო მუჯირი: „თუ დაიკარგება ეს უწმინდესი ღირებულება, მაშინ ჩვენი ერიც ვეღარ იარსებებს და გადაშენდება“

დღეს ოჯახის სიწმინდისა და სიმტკიცის დაცვის დღე აღინიშნება. 

ოჯახის სიმტკიცის და მშობლების პატივისცემის დღესთან დაკავშირებით საპატრიარქო ტახტის მოსაყდრემ, მეუფე შიო მუჯირმა სასულიერო პირებთან ერთად ქაშუეთის ტაძარში პარაკლისი აღავლინა.

მეუფე შიომ ქადაგებისას განაცხადა:

-„თქვენ ალბათ იცით ეკლესიის სწავლება, – ადამიანი შექმნილია ხატად და მსგავსად ღვთისა. რაც შეეხება მსგავსებას, ამაზე არსებობს წმინდა მამათა სწავლება შეთანხმებული, მაგრამ რაც შეეხება ხატებას ამაზე გამოთქმულია სხვადასხვა აზრი, მამათა უმრავლესობა ამბობს, – „ხატება მდგომარეობს ადამიანის გონებაში, მის თავისუფალ ნებაში“, ასევე ამბობენ, რომ ეს არის სული, სამშვინველი და სხეული, მაგრამ არიან წმინდა მამები, რომლებიც ასწავლიან, –  ყოვლადწმინდა სამების ხატება გახლავთ ოჯახი. ქორწინება არის ერთ-ერთი უმთავრესი ნიშანთვისება ადამიანისა, რითიც ჩვენ განვსხვავდებით პირუტყვებისგან, არის რამდენიმე უმთავრესი ნიშან თვისება, ეს არის გონება, ეს არის სიტყვა, რელიგია და ქორწინება. ამ მხრივ ჩვენ შეიძლება ვთქვათ, –  ჩვენთვის ძვირფასია ოჯახი, როგორც ღვთისგან ბოძებული სიწმინდე და როგორც ადამიანის ერთ-ერთი უმთავრესი ნიშანთვისება.

როდესაც ადამიანი ხელყოფს ოჯახის სიწმინდეს, შეურაცხყოფს მას, როდესაც ადამიანი აკნინებს სიტყვის ნიჭს და როდესაც ადამიანი უარყოფს რელიგიას, რა თქმა უნდა, ეს იმას ნიშნავს, რომ გონებასაც კარგავს ადამიანი და ასეთი ადამიანი შეიძლება იწოდოს სრულყოფილად? ამრიგად, დღეს ჩვენ ვიცავთ ამ სიწმინდეს, დღეს დადგა ეს საჭიროება, ჩვენს წინაპრებს არასდროს ჰქონიათ ასეთი საჭიროება, იმიტომ რომ თავისთავად იგულისხმებოდა, დღეს დადგა და ვიმეორებ, რომ ჩვენ კი არ აღვადგენთ რამე წესს, ჩვენს მამა-პაპათა მიერ მოგონოლს, არამედ უშუალოდ ღვთის მიერ მოცემულს, ჩვენ ვზრუნავთ იმისთვის, რომ დავიმკვიდროთ ჩვენი ადგილი მომავალში, თუ დაიკარგება ეს უწმინდესი ღირებულება, მაშინ ჩვენი ერიც ვეღარ იარსებებს და გადაშენდება“.

კომენტარები