“მხოლოდ იგორ გიორგაძეს შეუძლია, ნათელი მოჰფინოს ზვიად გამსახურდიას მკვლელობის იდუმალ დეტალებს!” – ზაზა დავითაია:

ჟურნალისტი ზაზა დავითაია ფეისბუქის საკუთარ გვერდზე სკანდალურ პოსტს აქვეყნებს:

 

გაინტერესებთ, რატომ არ იხსნება პრეზიდენტ ზვიად გამსახურდიას მკვლელობის საქმე?

იმიტომ, რომ ერთადერთი ადამიანი, ვისაც დოკუმენტურად შეუძლია გარდამტეხი ცვლილების შეტანა მკვლელობის გამოძიებაში – გახლავთ საქართველოს უშიშროების ყოფილი მინისტრი,

იგორ გიორგაძე,

რომელიც, თავის მხრივ, სრულიად უსაფუძვლოდ და დაუსაბუთებლად, უკვე 25 წელია, პოლიტიკურად იდევნება, იძულებით ემიგრაციაში იმყოფება და მოკლებულია შევარდნაძის და სააკაშვილის რეჟიმების მიერ მის წინააღმდეგ აგორებული ცილისმწამებლური შავი პიარის გაბათილების შესაძლებლობას!
ქართველი საზოგადოების უმრავლესობამ ისიც არ იცის, რომ იგორ გიორგაძის საქართველოდან განდევნა და მტრის ხატად გამოცხადება სწორედ, იმ უტყუარ ინფორმაციებს უკავშირდება, რომელიც მას ზვიად გამსახურდიას მკვლელობის შესახებ გააჩნია!!!

გაიხსენეთ:

1994 წელს ედუარდ შევარდნაძის განკარგულებით შექმნილმა სამთავრობო კომისიამ ზვიად გამსახურდიას გარდაცვალების მიზეზად თვითმკვლელობა დაასახელა. კომისიის ერთადერთმა წევრმა არ მოაწერა ხელი ასეთ დასკვნას. ის გახლდათ საქართველოს სახელმწიფო უშიშროების სამსახურის თავმჯდომარე

იგორ გიორგაძე!

 – „ზვიად გამსახურდიას დაღუპვის ჩემთვის ცნობილმა გარემოებებმა, მისი გვამის ფოტოს შესწავლის შედეგებმა და შევარდნაძესთან საუბრების ანალიზმა მომცა სერიოზული საბაბი, მევარაუდა, რომ საქართველოს პირველ პრეზიდენტს თავი არ მოუკლავს, არამედ ის მოკლულია!“
– ამბობს იგორ გიორგაძე და მისთვის ცნობილ უმნიშვნელოვანეს, აქამდე გასაიდუმლოებულ ინფორმაციებზე მიანიშნებს!
 დიახ, მხოლოდ იგორ გიორგაძეს შეუძლია, ნათელი მოჰფინოს ზვიად გამსახურდიას მკვლელობის საიდუმლოებით მოცულ დეტალებს, მაგრამ საქართველოს ხელისუფლება მას მწვანე შუქს არ უნთებს
2 მიზეზით:
1. ზვიად გამსახურდიას მკვლელობის გამო საქართველოს წინაშე უმძიმეს დანაშაულში იმხილებიან საზოგადოებისთვის კარგად ცნობილი კონკრეტული პირები, მათგან ზოგიერთი ჯერ კიდევ ცოცხალია (ვაი, ასეთ სიცოცხლეს)!
2. საქართველოს ხელისუფლებას მოუწევს აღიარება, რომ პირადად იგორ გიორგაძეს საქართველოს სახელმწიფოს წინაშე არანაირი დანაშაული არ მიუძღვის, ხოლო მის წინააღმდეგ წარდგენილი ყველა ბრალდება იმდენად უსუსურია, რომ ვერც ერთი მათგანი ვერ მტკიცდება სასამართლოზე, რომელიც ამჟამად თბილისში მიმდინარეობს. ეს პროცესი უსაშველოდ ჭიანურდება, ვინაიდან, საქმის მასალების მიხედვით, იგორ გიორგაძეს სრულად გამართლების პერსპექტივა გააჩნია! პოლიტიკური დევნის დაწყებიდან 25 წლის განმავლობაში დღემდე – იგორ გიორგაძის მიმართ გამამტყუნებელი განაჩენი ბუნებაში არ არსებობს!
იმის მიუხედავად, რომ ჯერ შევარდნაძის, შემდეგ კი სააკაშვილის ძალოვნებმა განსაკუთრებული მიზანდასახულობით იმუშავეს ბრალდების წარსადგენად, მათ ვერ შეძლეს ვერანაირი მტკიცებულების, დოკუმენტის და ვერც კონკრეტული მოწმის მოძიება, რის საფუძველზეც იგორ გიორგაძის მიერ ჩადენილი თუნდაც ერთი დანაშაულის დამტკიცება გახდება შესაძლებელი!
ქართველი საზოგადოების დიდმა ნაწილმა ისიც არ იცის, რომ 2015 წელს „ზვიად გამსახურდიას თვითმკვლელობის საქმის“ განზრახ მკვლელობის საქმედ გადაკვალიფიცირება სწორედ იგორ გიორგაძის განცხადებების საფუძველზე მოხდა!
ხელისუფლებავ! მიეცი საშუალება იგორ გიორგაძეს, ოფიციალურად, ობიექტური და მიუკერძოებელი სასამართლოს წინაშე ამხილოს პრეზიდენტ ზვიად გამსახურდიას მკვლელები!

 

 – წერს ზაზა დავითაია და იგორ გიორგაძის მონაწილეობით 2015 წლის ივლისში გასული სატელევიზიო გადაცემის ვიდეოკადრებს ავრცელებს.

 

შეგახსენებთ, რომ ოფიციალური ვერსიის თანახმად, საქართველოს რესპუბლიკის პირველი პრეზიდენტი ზვიად გამსახურდია 1993 წლის 31 დეკემბერს სამეგრელოს სოფელ ძველ ხიბულაში გარდაცვლილი იპოვეს.

თავიდან, 1994 წელს გამოძიება თვითმკვლელობის მუხლით დაიწყო. 2009-2011 წლებში საქართველოს პარლამენტში ზვიად გამსახურდიას გარდაცვალების საქმეზე იმუშავა დროებითმა სპეციალურმა კომისიამ, ხოლო 2015 წელს  საქართველოს მთავარმა პროკურატურამ საქმის გამოძიება განზრახ მკვლელობის მუხლით გადააკვალიფიცირა.

 

 

კომენტარები