ოპოზიიცის გეგმა -„ვიწყებთ ეროვნულ-განმათავისუფლებელ მოძრაობას“- „ხელისუფლებას ვაიძულებთ, წავიდეს კომპრომისზე“

-„აუცილებელია აქციები. დღეს 15:00 საათზე შევიკრიბებით კანცელარიასთან. ვიმსჯელებთ შემდეგ აქციებზეც. აქციები იქამდე გაგრძელდება, სანამ  არ იქნება მიღწეული ის შედეგი, რაც  ქვეყანას სჭირდება.

ჩვენი პარტნიორების ნაცვლად პროგნოზირება არ მიყვარს, მათი განცხადებები თავად მეტყველებს იმაზე, რისი თქმაც სურთ. ჩვენ ნანახი გვაქვს, როგორ ამთავრებენ ოლიგარქები, რომლებიც საკუთარი ხალხის თავისუფლების და ამ ხალხის მოკავშირე თავისუფალი სამყაროს წინააღმდეგ მიდიან. არ გვაქვს უფლება, ხელიდან გავუშვათ თავისუფლების დაცვის შანსი“, – განაცხადა  „ევროპული საქართველოს“ ლიდერმა, გიგია ბოკერიამ.

„ნაციონალური მოძრაობის“ წევრმა, ზაალ უდუმაშვილმა განაცხადა:

-„ჩვენი ერთიანობით და  სიმტკიცით ხელისუფლებას ვაიძულებთ, წავიდეს კომპრომისზე. ნიკა მელია პატიმრობიდან სასწრაფოდ უნდა გათავისუფლდეს.  ჩვენი აუცილებელი პირობა არის, -ნიკა მელია სასწრაფოდ უნდა გათავისუფლდეს პატიმრობიდან, თუ კიდევ სურს ხელისუფლებას, -რაიმე შანსი იყოს, ქვეყანა გამოვიდეს ამ პოლიტიკური ჩიხიდან. რა თქმა უნდა, აქციებს დავიწყებთ, მოსახლეობას ვაცნობებთ კონკრეტლ თარიღებს.  ის, რაც დღეს ხდებოდა „ნაციონალური მოძრაობის“ ოფისში, მგონია, ყველამ ნახა, არა მარტო ჩვენმა მოსახლეობამ, არამედ მთელმა საერთაშორისო საზოგადოებამ. ბუნებრივია, რეაქციაც ამ ყველაფერზე ექნება შესააბამისი. ჩვენ არაფერი არ დაგვიტოვა ხელისუფლებამ გარდა იმისა, -გადავიდეთ ქუჩის პროტესტზე, ყველა გზა ჩახერგა თავად, ყველა ხიდი დაწვა. ახლა იქნება ძალიან მძლავრი პროტესტი. ბუნებრივია, ხელისუფლებას ვაიძულებთ, დიახ, ჩვენი პროტესტით ვაიძულებთ, -დათანხმდეს იმ პირობებს, რომელიც ოპოზიციას აქვს.

რაც შეეხება შენობის შიგნით მხუთავი აირის გამოყენებას, ეს აკრძალულია აბსოლუტურად ყველა კონვენციით, დახურულ სივრცეში არ შეიძლება ასეთი აირების გამოყენება, რადგან, შესაძლოა, დასრულდეს ლეტალურად. დღეს მართლაც გაგვიმართლა, -ამ ადამიანებმა შეძლეს, გამოსულიყვნენ მდგომარეობიდან, იმდენად დიდი შოკი იყო ყველასთვის. იმ ოთახში ქალბატონები ბრძანდებოდნენ, ალბათ ყველამ ნახეთ. ასე გაიმეტა საკუთარი მოსახლეობა „ქართულმა ოცნებამ“. ის, რომ პოლიტიკური ოპონენტია, არ ნიშნავს, მას უნდა გაუსწორდეს მხუთავი აირით და ასეთი შტურმი მოაწყო ოპოზიციური პარტიის ოფისზე“, – განაცხადა ზაალ უდუმაშვილმა.

„ნაციონალური მოძრაობის“ წევრმა, ხატია დეკანოიძემ განაცხადა:

-„დავასრულეთ საკოორდინაციო შეხვედრა ჩვენს ოპოზიციურ პარტიებთან, სხვადასხვა პარტნიორთან, ყველას აზრი არის ერთნაირი, -ეს იყო როდიონოვის მიერ ჩატარებული სპეცოპერაცია, როდესაც საბჭოთა არმიის დაბადების დღეს მთავარი ოპოზიციური ძალის ოფისში შემოვარდნენ, დაარბიეს ყველაფერი, დააპატიმრეს მთავარი ოპოზიციური პარტიის არჩეული ახალი ლიდერი ნიკა მელია, ჩემი მეგობარი.

ვიმსჯელეთ სამომავლო გეგმებზე. როგორც იცით, ეს იქნება მუდმივი პროტესტი. არც ერთი წუთით უკან დახევას არ ვაპირებთ. მინდა, მივმართო თითოეულ ადამიანს, რომელსაც გული შესტკივა ჩვენს სამშობოლოსა და თავისუფლებაზე, აქ საქმე აღარ არის უკვე მარტო ნიკა მელიაზე, ჩემს მეგობარზე, რომელიც დღეს დააპატიმრეს. საქმეა, ვაძლევთ თუ არა ჩვენ საშუალებას რეჟიმს, ივანიშვილის ოლიგარქიულ პრორუსილ რეჟიმს, რომ საბოლოოდ გადაუაროს, თავის მსახურებად გადაგვაქციოს, თუ ვიბრძვით თავისუფლებისთვის. პირობას ვაძლევ ყველაზე რეგვენს, ვინც დღეს პარლამენტის ტრიბუნიდან ზიზღის ენას აფრქვევდა პოლიტიკური ოპონენტების წინააღმდეგ, არ მოხდება ისე, რომ საქართველოს თავისუფლებას საფრთხე დაემუქროს, არ მოხდება ისე, რომ საქართველოს ევროატლანტიკურ სტრუქტურებში გაწევრიანებას საფრთხე დაემუქროს. ამის პირობას გაძლევთ ყველა ის ადამიანი, ვინც დღეს ვიყავით ზუსტად ამ თავისუფლების ფრონტზე.

ძალიან მტკიცედ, შეუპოვრად ვიწყებთ ძალიან დიდ, ეროვნულ-განმათავისუფლებელ მოძრაობას ბოლშევიკური რეჟიმისგან. ეს არის როდიონოვები, როდიონოვის რეჟიმი, ამიტომ, ახლა მომეცით საშუალება, -ვიმუშაო რამდენიმე წუთი. ვისაც აინტერესებს გამოხმაურება საერთაშორისო საზოგადოების მხრიდან, შეუძლია, გადაავლოს თვალი მაგალითად, -„ტვიტერს“, – მძიმე განცხადებები კეთდება, მათ შორის კეთდება განცხადებები ყველაზე სევდიანი და ტრაგიკული, რომ საქართველომ გადაუხვია ევროატლანტიკური კურსიდან. ჩვენ ამას არ დავუშვებთ, ეს კომუნკაცია არის მუდმივად, ახლაც კომუნიკაციაა. შესაბამისად, რა თქმა უნდა, ჩვენს პარტნიორებთან კომუნიკაცია იქნება მუდმივი, ყოველწუთიერი, არა მხოლოდ აქაურ დიპლომატებთან, არამედ ჩვენს დედაქალაქებთან, პარტნიორების დედაქალაქებთან. პირობას გაძლევთ, არ დავუშვებთ, რომ ამ ქვეყნის მომავალს საფრთხე დაემუქროს, ვიქნებით 10 000, გავიზრდებით, ვიქნებით 20 000, ნიკა აუცილებლად გამოვა თავისუფლებაზე. არ ვიცი, გვიყურებს თუ არა, მაგრამ კიდევ მინდა, გავუმეორო, ვამაყობ, რომ მისი თანამებრძოლი ვარ. ყველაზე მნიშვნელოვანი, რა თქმა უნდა, ჩვენ თავისუფალი მედიის, თავისუფალი სიტყვის, ასევე ჩვენი დიდი მოკავშირეების იმედი გვაქვს“, – განაცხადა ხატია დეკანოიძემ.

„ლელოს“ ლიდერმა, მამუკა ხაზარაძემ განაცხადა:

-„შევთანხმდით, რომ იქნება შეუპოვარი ბრძოლა კონსტიტუციის ფარგლებში, ამ ქვეყანას ვერ გავატანთ მოძალადე ხელისუფლებას. შექმნილი სიტუაციიდან გამოსავალი პოლიტპატიმრების გათავისუფლებასა და რიგგარეშე არჩევნებშია. კონკრეტული მოთხოვნები არის, -ნიკა მელია უნდა გათავისუფლდეს, პოლიტპატიმრები უნდა გათავისუფლდნენ და დაინიშნოს რიგგარეშე არჩევნები. , ოპოზიციას კომუნიკაცია აქვს დიპლომატებთან, დღის განმავლობაში საერთაშორისო საზოგადოების მხრიდან გამოხმაურება უფრო დიდ მასშტაბს მიიღებს“.

„ნაციონალური მოძრაობის“ თავმჯდომარე, ნიკა მელია დღეს დააკავეს. 

ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა.

18 თებერვალს, გიორგი გახარიამ პრემიერ-მინისტრის პოსტი დატოვა.

„ქართულმა ოცნებამ“ პრემიერ-მინისტრობის კანდიდატად ირაკლი ღარიბაშვილი, 19 თებერვალს წარადგინა. 

პრემიერ-მინისტრის გადადგომასთან დაკავშირებით, შინაგან საქმეთა სამინისტრომ ნიკანორ მელიას საქმეზე დაგეგმილი ღონისძიება დროებით გადაიდო.

22 თებერვალს, მეათე მოწვევის პარლამენტმა ირაკლი ღარიბაშვილის მთავრობას ნდობა გამოუცხადა.

კომენტარები