რატომ არ უნდა დატოვოთ არასდროს ბავშვები ჩახუტების გარეშე? -ძილის წინ მათთვის დრო აუცილებლად გამონახეთ
თუ ბავშვი ღამით მასთან ერთად დაწოლას ან ჩახუტებას გთხოვთ,მისი თხოვნა შეასრულეთ. პატარები ძილის წინ ხშირად ჭირვეულობენ, მშობლებს კიდევ ერთი ზღაპრის წაკითხვას, ჩახუტებას და მათთან ერთად დაძინებას სთხოვენ. უფროსები ბავშვების დროულად და სწრაფად დაძინებას ცდილობენ, ყოველდღიურ საქმიანობას დროულად რომ მორჩნენ. თვლიან, ბავშვების ახირებების შესრულება მათ ძალიან ბევრ დროს წაართმევს. ზოგიერთი მშობელი მიიჩნევს, რომ ღამით ბავშვებთან ერთად წამოწოლა ძალიან ცუდი ჩვევაა. მშობლების ნაწილი მაინც ცდილობს, ბავშვებს თხოვნა შეუსრულოს, თვლიან, რომ ამ საოცარ წუთებს ცხოვრებაში ვეღარასდროს დაიბრუნებს.
უფროსებს ყოველთვის რაღაც საქმე გვაქვს გასაკეთებელი. ვერასდროს ვიცლით ბავშვებისთვის ისე, როგორც ეს მათ სჭირდებათ, ვცდილობთ, დრო ისე გადავანაწილოთ, ყველაფერი მოვასწროთ, ამის გამო ჩვენი შვილების წინაშე თავს ხშირად დამნაშავედ ვგრძნობთ.
ერთ-ერთი მშობელი იხსენებს, – ის ყოველთვის ცდილობდა ბავშვების დროულად დაძინებას, უარს ამბობდა მათთან წამოწოლაზე, მნიშვნელოვანი საქმეების გამო. როდესაც ბავშვებს ეძინათ, ერთ ღამეს ის შვილების საძინებელში შეიპარა. მისმა უმცროსმა ქალიშვილმა დედის ოთახში ყოფნა იგრძნო, მაშინვე გამიღვიძა. დედას ჩახუტებას სთხოვდა. დედამ მისი თხოვნა შეასრულა. ბავშვთან ერთად წამოწვა, შვილს ჩაეხუტა. ბავშვს მაშინვე ღრმად დაეძინა. დედა ამბობს, ეს ერთ-ერთი ყველაზე დაუვიწყარი წუთი იყო მის ცხოვრებაში. მისი აზრით, ბავშვებთან გატარებული თითოეული წუთი ძალიან მნიშვნელოვანია. ღამის საათებში შვილებთან ერთად წამოწოლა, მათი ფიქრების, საზრუნავის და ოცნებების მოსმენა, მათი სიხარულის გაზიარება, მათ გვერდით ყოფნა ნებისმიერი დედისთვის დაუვიწყარია. ეს ის საჩუქარია, რომელსაც ყველა მშობელი უნდა გაუფრთხილდეს.
ექსპერტების მოსაზრებები დედებისთვის ყოველთვის მისაღები არ არის. შვილებისთვის ძილის წინ დამატებითი დროის გამოყოფა არავის დააზიანებს. გახსოვდეთ, ბავშვები ერთ დღესაც შეწყვეტენ მშობლებისთვის ჩახუტების ან მათთან ერთად დაძინების თხოვნას. შესაძლოა, ეს ხვალ არ მოხდეს, მაგრამ აუცილებლად მოვა დრო, როდესაც თქვენი ჩახუტებისა და ზღაპრების გარეშე ტკბილად დაძინებას შეძლებენ. ის, რაც დღეს სამუდამოდ გეჩვენებათ, ერთ დღეს გაქრება, თქვენ საოცარი მოგონებების შეგროვებას დაიწყებთ, მაგრამ, თუ ყოველთვის ექსპერტების რჩევებს დაუჯერებთ, აღმოაჩენთ, რომ ასეთი მოგონებები ძალიან ცოტა გაქვთ.
თეფშებისა და თეთრეულის რეცხვა და სხვა საქმეები მოიცდის, არც გადასახადების გადახდაა მნიშვნელოვანი. ეს ყველაფერი თქვენს ცხოვრებაში 20 წლის შემდეგაც იქნება, მაგრამ 20 წლის შემდეგ თქვენ აღარ გეყოლებათ 3 წლის შვილი, რომელსაც თქვენი მოფერება და ჩახუტება ძალიან უნდა და სჭირდება.
თქვენი შვილები იმაზე სწრაფად იზრდებიან, ვიდრე წარმოგიდგენიათ. ასაკთან ერთად ისინი დამოუკიდებლად ძილს მიეჩვევიან. 18 წლის ასაკში შვილები ნამდვილად არ მოგთხოვენ ღამით ზღაპრის წაკითხვას და მათთან ერთად დაძინებას. არ არსებობს მიზეზი, რის გამოც შვილის ღამით ჩახუტებაზე ან მათთვის ზღაპრის მოყოლაზე უარი უნდა თქვათ. არასდროს დატოვოთ ბავშვები ჩახუტების გარეშე. ძილის წინ მათთვის დრო აუცილებლად გამონახეთ.
დღეში 1440 წუთი გაქვთ იმისთვის, სხვადასხვა საქმით დაკავდეთ. თქვენი შვილები კი თქვენგან მხოლოდ რამდენიმე წუთს და მცირე ყურადღებას ითხოვენ.
მომზადებულია thesoccermomblog.com-ის მიხედვით
კომენტარები