„ქართველი სამხედროები ავღანეთს დატოვებენ“ – დავით ზალკალიანი

-„ჩრდილოატლანტიკურმა ალიანსმა მიიღო გადაწყვეტილება, ეტაპობრივად დაასრულოს ავღანეთის მისია და გამოიყვანოს საჯარისო შენაერთები ავღანეთის ტერიტორიიდან.

საქართველო, როგორც საერთაშორისო თანამეგობრობის პასუხისმგებლიანი წევრი, პარტნიორებთან ერთად ყოველთვის შეიტანს საკუთარ წვლილს ავღანეთის შემდგომი მშვიდობიანი განვითარებისთვის.

საქართველო, რომელიც დღემდე აღნიშნული მისიის ერთ-ერთი უმსხვილესი კონტრიბუტორია და 860 სამხედრო მოსამსახურით არის წარმოდგენილი ავღანეთში, ბუნებრივია, თანხვედრაშია ჩვენი პარტნიორების გადაწყვეტილებასთან და ქართველი სამხედროებიც შეთანხმებული გრაფიკით და პარტნიორებთან მჭიდრო კოორდინაციით დატოვებენ ავღანეთს.

მადლობელი ვარ აშშ-ის სახელმწიფო მდივნის ენტონი ბლინკენის, რომელმაც გუშინ, საჭიროდ ჩათვალა, პირადად შეეტყობინებინა ჩემთვის ალიანსის გადაწყვეტილების შესახებ. ეს კიდევ ერთხელ ადასტურებს იმას თუ რაოდენ აფასებს ამერიკის შეერთებული შტატები და ალიანსი საქართველოს წვლილს გლობალურ უსაფრთხოებაში.

სახელმწიფო მდივანმა განსაკუთრებული მადლობა გადაუხადა ქართველ სამხედროებს გაწეული ძალისხმევისა და მსხვერპლისთვის, რომელიც მათ გაიღეს მსოფლიო მშვიდობისთვის. მართლაც, საქართველომ არაერთხელ დაამტკიცა, რომ ჩვენ შეგვიძლია ღირსეულად ვიტვირთოთ კოლექტიური თავდაცვის პასუხისმგებლობა.
ჩემის მხრივ, მადლობას ვუხდი ქართველ სამხედროებს, ვინც მსახურობდა ავღანეთში,

ასევე, ქედს ვიხრი იმ გმირი სამხედროების ხსოვნის წინაშე, ვინც თავი შესწირა მშვიდობას და უსაფრთხოებას.
საქართველო კი, როგორც საერთაშორისო თანამეგობრობის პასუხისმგებლიანი წევრი, პარტნიორებთან ერთად ყოველთვის შეიტანს საკუთარ წვლილს ავღანეთის შემდგომი მშვიდობიანი განვითარებისთვის“, – წერს საქართველოს საგარეო საქმეთა მინისტრი, დავით ზალკალიანი სოციალურ ქსელში.

ავღანეთიდან ამერიკული ძალების გაყვანა პირვეკ მაისს დაიწყება.

კომენტარები