შაქარაშვილის საქმეში არსებული რამდენიმე მოწმის ჩვენება გასაჯაროვდა – „ფიზიკური შეურაცხყოფის მიყენება დაუწყეს. გვეძახდნენ, გაჩერდით სად გარბიხართო და თან გვაგინებდნენ”

ტელეკომპანია „იმედის“ ეთერში,  ფეხბურთელ გიორგი შაქარაშვილის საქმეში არსებული რამდენიმე მოწმის ჩვენება გასაჯაროვდა.

 ერთ-ერთი მთავარი მოწმე  ვახტანგ ახვლედიანი მცხეთაში გზატკეცილის ეპიზოდზე, გამოძიებასთან საუბრობს:

-„ისინი ვინც ავტომანქანიდან გადმოვიდნენ, მოგვზდევდნენ უკან და გვეძახდნენ გაჩერდით სად გარბიხართო და თან გვაგინებდნენ. ჩვენ ყველამ ერთად ხიდზე გადავკვეთეთ გზა, გადავედით საავტომობილო გზის მეორე მხარეს და გავრბოდით. მე ხიდზე როგორც კი გადავედი იქვე ჩავუხვიე დაბლა და როგორც კი ჩავუხვიე ვნახე იქვე არსებული ბუჩქები და ჯაგები. და გავიქეცი იქითკენ და დავიმალე აღნიშნულ ბუჩქებში. ხოლო სხვები საით და რა მიმართულებით გაიქცნენ არ ვიცი, რადგან იყო ღამე.

მე სანამ ჩავუხვევდი ბუჩქებისკენ დავინახე, რომ ჩემს წინ მირბოდა გიორგი შაქარაშვილი და მე რომ ჩავუხვიე ბუჩქებისკენ, ისინი ვინც მოგვზდევდნენ გაეკიდნენ გიორგი შაქარაშვილს. ხოლო შემდეგ თუ ვინ საით გაიქცა არ დამინახავს. მე ჩუმად ვიჯექი და ვიმალებოდი ბუჩქებში, რა დროსაც საავტომობილო გზის მხრიდან დაახლოებით 10 წუთი მესმოდა ძახილის ხმა „სად გაიქეცით, გამოდითო“ და თან გვაგინებდნენ“.

გზატკეცილზე მომხდარ ინციდენტზე საუბრობს, საქმის მეორე მოწმე, ფოტოგრაფი იაკობ ბრეგვაძე:

„როდესაც შენობიდან გადავიხედე ინციდენტის ადგილას სადაც მანქანა იყო გაჩერებული დავინახე ორი ბიჭი. რა დროსაც მოვიდა მეორე ავტომანქანა, სავარაუდოდ მერსედესის მარკის. ვინაიდან იყო 20 მეტრი და მაშორებდა სიბნელე ზუსტად ვერ გავერკვიე მარკა, მოდელი და სახელმწიფო ნომერი საიდანაც გადმოვიდა სამი ბიჭი, რომელებმაც ფიზიკური შეურაცხყოფის მიყენება დაუწყეს ადგილზე მყოფ ორ ბიჭს. აყენებდნენ ფიზიკურ შეურაცხყოფას და თან აგინებდნენ“.

ძიუდოისტი გიორგი ტატიაშვილის ჩვენებიდან:

-„მე დავძარი მანქანა, რადგან არ მინდოდა მომხდარიყო ჩხუბი, მაგრამ ჩემს მანქანაში მჯდომი პირები ცდილობდნენ გაეღოთ კარები და გადმოსულიყვნენ. რაზეც იძულებული გავხდი მანქანა გამეჩერებინა. როდესაც მანქანა გავაჩერე ჩემი მგზავრები გადმოვიდნენ და გაიქცნენ, ჩვენ წინ ფეხით მოძრავი ჩვენთვის უცნობი პიროვნებების მიმართულებით. რა დროსაც დავინახე, რომ ჩემს გვერდით მჯდომი სრული აღნაგობის პიროვნებამ რომელსაც ხელში ეჭირა რკინის ჯოხი, დაარტყა ერთ-ერთს ფეხში. რა დროსაც ჩვენს წინ ფეხით მოძრავი პირები გაიქცნენ. რომელსაც გაეკიდნენ ჩემი მგზავრები და ერთ-ერთი მათგანი დაიჭირეს. რომელსაც ჩემი ყველა თანმხლები პირი ურტყამდა.

მე მათ ვთხოვდი თავი დაენებებინათ მისთვის და წამოსულიყვნენ თუმცა ისინი მაინც აგრძელებდნენ ჩემთვის უცნობი პირების ცემას და მე ჩემ მგზავრებს გიორგი შერმადინს და ლაშა მერაბიშვილს მოვატყუე რომ მოდიოდა პოლიცია, რაზედაც ჩემი კლასელები ლაშა შერმადინი, გიორგი მერაბიშვილი, თენგო ბარბაქაძე, ირაკლი მუმლაძე, ქანაშვილი რომლის სახელიც არ ვიცი და ასევე ჩემთვის უცნობი სრული აღნაგობის პიროვნება და ნ.ც ჩასხდნენ ჩემს მანქანაში და ყველა ერთად წავედით თბილისში“.

28 ივნისს მცხეთის რაიონულმა სასამართლომ ფეხბურთელ გიორგი შაქარაშვილის საქმეზე ბრალდებულ 17-ვე პირს აღკეთის სახით პატიმრობა შეეფარდა. პროცესი დახურულ რეჟიმში მიმდინარეობდა. საქმეში ექვსი ბრალდებული არასრულწლოვანია.

27 ივნისს პროკურატურამ დაკავებულების მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს მიმართა.

26 ივნისს საქმეზე 17 ახალგაზრდა დააკავეს. მათ შორის არიან მცხეთის აგარაკზე მომხდარი კონფლიქტის უშუალო მონაწილეები და ის მორაგბეები, რომლებიც ავტომობილით მოგვიანებით ჩავიდნენ.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.

კომენტარები