ჭიათურაში მაღაროელები გაიფიცნენ

ჭიათურის მაღაროს ადმინისტრაციის ინფორმაციით, ამ დროისთვის 200-მდე მაღაროელია გაფიცული. მათთან შეთანხმებას კომპანიამ ვერ მიაღწია, რის გამოც მაღაროთა უმეტესობამ მუშაობა შეაჩერა.
შეხვედრა თითქმის ორი საათის განმავლობაში გაგრძელდა, თუმცა უშედეგოდ. მაღაროელებმა აქციაზე ისევ ადმინისტრაციის შენობასთან გადაინაცვლეს.
„ჯორჯიან მანგანეზის“ სპეციალური მმართველის, ნიკოლოზ ჩიქოვანის თქმით, ამ ეტაპზე კომპანიას ხელფასის მაქსიმიმუმ 15%-იანი ზრდა შეუძლია, თუმცა ამ შეთავაზებაზე დასაქმებულებმა უარი განაცხადეს.
ჩიქოვანმა მათ დრო ოთხშაბათამდე სთხოვა, რათა მთავრობასთან და შესაბამის უწყებებთან მოლაპარაკებები ეწარმოებინა, თუმცა მაღაროელებმა ამ თხოვნაზეც უარი განაცხადეს და შეხვედრა პროტესტის ნიშნად დატოვეს.
დღესვე „ქართული ოცნების“ პოლიტიკურმა მდივანმა ირაკლი ღარიბაშვილმა ჭიათურაში გაფიცულ მაღაროელებს სოლიდარობა გამოუცხადა. ღარიბაშვილის თქმით, პროტესტი სამართლიანია და მას რეაგირება სჭირდება.
მაღაროელების ნაწილი 15 მაისს გაიფიცა. მთავარი მოთხოვნა ხელფასების 50%-იანი გაზრდა, ჯანდაცვის და შრომის პირობების გაუმჯობესება და ქალაქში ეკოლოგიური ვითარების გამოსწორებაა.