ზვიად ტომარაძე: „2015 წლიდან დღემდე საქართველოში ირანის მოქალაქეებზე 10 991, მოკლევადიანი ბინადრობის ნებართვაა გაცემული“
ორგანიზაცია „ერი და სახელმწიფოს“ ხელმძღვანელმა ზვიად ტომარაძემ მედიაჰოლდინგ „კვირას“ პრესკლუბში პრესკონფერენცია გამართა.
-„2015 წლიდან დღემდე საქართველოში ირანის მოქალაქეებზე 10 991, მოკლევადიანი ბინადრობის ნებართვაა გაცემული. მეორე ადგილზეა რუსეთი – მის მოქალაქეებზე 693 ნებართვაა გაცემული, ხოლო მესამეზეა უკრაინა, რომლის მაჩვენებელიც 225-ია.
ოფიციაულური მონაცემებით დავინტერესდი, რომელი ქვეყნის მოქალაქეებმა მიიღეს მოკლევადიანი ბინადრობის ნებართვები და რამდენია მათი ოდენობა.
2015 წლიდან დღემდე პირველ ადგილზე არის ირანი. ირანის მოქალაქეებზე გაცემულია 10 991, თითქმის 11 000 მოკლევადიანი ბინადრობის ნებართვა. როგორც მინიმუმ 11 000 საცხოვრებლი სახლი, ბინა არის გაყიდული ირანის მოქალაქეებზე. შეიძლება ეს მაჩვენებლი კიდევ უფრო მეტი იყოს, რადგან შეიძლება ირანის სხვა მოქალაქეებმაც შეიძინეს ბინა, თუმცა, ჯერჯერობით, გადმოსვლას არ ჩქარობენ.
მეორე ადგილზე არის რუსეთი, სულ რაღაც 693 ნებართვაა გაცემული. მესამეზეა უკრაინა – 225 ბინადრობის ნებართვაა გაცემული.
2018 წელს დეპუტატებმა ივლიანე წულაიამ და გოჩა ენუქიძემ წარადგინეს კანონპროექტი. კანონპროექტის თანახმად, იმისთვის, რომ უცხოელმა ერთწლიანი ბინადრობის მოწმობა აიღოს, უნდა შეიძინოს უძრავი ქონება, რომლის საბაზრო ღირებულება აღემატება 100 ათასი დოლარის ეკვივალენტს ლარში, ნაცვლად 35 ათასი აშშ დოლარის ეკვივალენტისა. ისინი ამბობდნენ, რომ ეს იყო სტაბილურობის და უსაფრთხოების საკითხი. ბევრჯერ აღვნიშნე, რომ ეს იყო სამშენებლო კომპანიების ლობისტური კანონპრექტი. კანონპროექტის მიხედვით: ახალ ჩამოსულ მიგრანტს 100 ათასის ზემოთ სთავაზობდნენ ბინადრობის ნებართვებს. გარდა ამისა, ვისაც 35 ათასიდან 100 ათასამდე ღირებულების ბინა ჰქონდა შეძენილი, ამ კანონის მიღების შემდეგ ვალდებული იყვნენ, ეყიდათ 100 ათას დოლარზე ზევით ღირებულების ბინა. ეს კანონი უკვე მოქმედებს. ადრე, თუ 35 ათასი დოლარის სანაცვლოდ შესაძლებელი იყო მოკლევადიანი ბინადრობის ნებართვის მოპოვება, ახლა უკვე, 2019 წლიდან შესაძლებელია 100 ათას დოლარზე ზევით. ისინი ამბობდნენ, რომ წესები გამკაცრდა. თუმცა, ოფიციალური მონაცემები, რომელიცაა იუსტიციის სახლიდან და მივიღეთ 1 კვირის წინ გვეუბნება სხვა რამეს. თუ ირანის მოქალაქეებზე 2018 წელს გაცემული იყო 4 643 ბინადრობის ნებართვა, 2019 წელს 5 652. ტემპი ზრდადია.
2018 წელს დავწერე კანონპროექტი, რომ აკრძალულიყო მოკლევადიანი ბინადრობის ნებართვების გაცემა. განვამრტავ, რომ ეს არის უცხოელებზე ბინადრობის ნებართვის გაცემა საკუთრების შეძენის სანაცვლოდ. ფაქტობრივად, ჩვენი სახელმწიფო ყიდის ბინადრობის ნებართვებს. ეს არის 2014 წელს მიღებული კანონი.
ბინადრობის გაცემის 10 სახე არსებობს, მათ შორის ერთერთია საკუთრების შეძენის საფუძველზე მიღებული ბინადრობის ნებართვები უცხოელებზე. სხვა სახეობის ნებართვებია: სასწავლო, სამუშაო, საინვესტიციო და ა.შ. ერთერთი მათაგნია ბინადრობის უფლების მიღება ოჯახის გაერთიანების მიზნით. რას ნიშნავს ეს: ვინც ბინადრობის უფლებას მიიღებს, მას შეუძლია ნათესავთა ფართო წრის ჩამოყვანა. როგორ განიმარტება ეს კანონით, ვინ შედიან ნათესავებში: ბებია, ბაბუა, შვილიშვილი, შვილი, და , ძმა ,ქმარი, ცოლი . გაგაცანით მონაცემები, რომ დაახლოებით 11 000 ბინაა გაყიდული. ანუ , სიტყვაზე რომ ვთქვათ, ამ 11 000-დან ,აქ ჩამოსული ადამიანების რაოდენობა შეიძლება, იქცეს 100 ათასამდე. დინამიკა ზრდადია. რამდენიმე წლის შემდეგ სავალალო სურათი გვექნება , ამის არგათვალისწინება ყოვლად დაუშვებელია.
ვიცით, რომ დემოგრაფიული პრობლემები გვაქვს, ასევე ჩვენი ქვეყნიდან მოსახლეობის დიდი ნაწილი გასულია და ეს პროცესი დღესაც გრძელდება. უცხოელების მასიურად ჩამოსვლა და დაფუძნება ჩვენს ქვეყანაში გამოიწვევდა ეთნო-კულტურული ბალანსის ცვლილებას ჩვენს ქვეყანაში და თუ ასე გაგრძელდება მკვიდრი მოსახლეობა დავრჩებით უმცირესობაში. ეს არის პირდაპირ ქვეყნის უსაფრთხოების საკითხი. ამ საკითხს უნდა მივუდგეთ სახელმწიფო ინტერესებიდან გამომდინარე“, – განაცხადა ტომარაძემ.